“İcra başçısı 200 nəfərin kartını mənimsəyib” - Məsələni araşdıran jurnalistə təzyiqlər olunur + VİDEO

11:04 22-02-2021 297

Qubanın İcra Hakimiyyətinin başçısı Ziyəddin Əliyev 200 nəfərin adını işə yazdırıb və kartlarını özü götürüb.

MillətinSəsi.info xəbər verir ki, bu iddia ilə Xaçmazda yaşayan müstəqil jurnalist Cəmil Məmmədli çıxış edib.

Jurnalist bildirib ki, icra başçısı rayon barədə araşdırma apardığını biləndən ona qarşı müxtəlif üsullarla təzyiqlər göstərir:

“Mən rayonla bağlı böyük araşdırma filmi hazırlayıram. Filmdə icra başçısının törətdiyi qanun pozuntuları faktlarla əks olunub. Rayona ötən il 525 kvota ayrılıb. İcra başçısı Qubada olan 31 icra nümayəndəsini çağırıb, tapşırıb ki, 200 nəfər “səsi çıxmayan”, fağır adam tapsınlar.

Onlar da tapıb. İcra başçısı fevral, mart, aprel aylarında 200 nəfərin kartına yatırılmış 250 manatı cibinə qoyub. O məbləğdən yalnız məmurlardan birinin Qubadakı villasının işıq pulunu ödəyib, vəssalam.

May ayında Prezident Administrasiyasının səlahiyyətli şəxslərindən biri Qubaya gələrək, qanunsuz əməllərə son qoymağı, məsələlərin ciddi araşdırıldığını deyib və kart məsələsinə də toxunub.

Bu iclasdan sonra - mayın 8-10-u arası həmin 200 nəfərin hamısı “işdən” çıxarılıb. Mən bunu araşdırmışam, əlimdə sübutlarım var. Təkcə kart məsələsini araşdırmamışam, həm də icra başçısının bələdiyyə sədrlərini, icra nümayəndələrini neçəyə təyin etdiyi, başqa qanunsuz əməllərini araşdırmışam. Onun mənə qarşı təzyiqlərinin heç bir əhəmiyyəti olamayacaq”.

Cəmil Məmmədli qarşılaşdığı təzyiqlərlə bağlı video müraciət də hazırlayıb. Həmin materialı təqdim edirik:

Bundan başqa, Qubanın İcra Hakimiyyətinin başçısı Ziyəddin Əliyevin DTX tərəfindən saxlanması barədə sosial şəbəkələrdə məlumat yayılıb.

MillətinSəsi.info xəbər verir ki, Sfera.az-ın əməkdaşı əlaqə saxlayaraq, mövzunu araşdırıb və yayılan məlumatın həqiqətə uyğun olmadığı bildirilib.

Qeyd edək ki, bu gün bəzi xəbər saytlarında İcra başçısı Ziyəddin Əliyevin 200 nəfərin kartını mənimsəməsi barədə məlumat yayılmışdı.

Daha sonra isə onun Ukraynadakı biznesi barədə məlumatlar tirajlanmışdı.

Bu məlumatlardan sonra sosial şəbəkələrdə Ziyəddin Əliyevin həbsi xəbəri yayılmışdı.