Körpələr evi uşaq bağçasının sahibəsi İradə İbrahimova: "Söküntünü aparan “Marin Qrup”un fəhlələrinə dedim ki, içəridə 40 nəfər uşaq var, məhəl qoymadılar" - VİDEO

19:59 07-07-2021 414

“Qanunla biz təmir işi apardığımıza görə, heç yerdən icazə almalı deyilik, ancaq Nəsimi Rayon İcra Hakimiyyətinin nümayəndəsi gəlib bizə bildirdi ki, təmir işləri aparmağa haqqınız yoxdur”.
Bu sözləri MillətinSəsi.info-ya müraciətində Nəsimi rayonu Nəsib bəy Yusifbəyli küçəsi 54 ünvanında yerləşən körpələr evi uşaq bağçasının sahibəsi İradə İbrahimova bildirib.

Şikayətçi deyir ki, onlardan işlərin dayandırılamsı tələb edilib: “Qonşuluqda gedən tikintidən bizə bildirdilər ki, sizin binanız qəzalı vəziyyətdədir. Biz də buna görə, binanın fasadında təmir işləri aparmaq qərarına gəldik. Sonra İcra Hakimiyyətindən dedilər ki, işi dayandırmalıyıq. Onlar deyən gündən bərpa işlərini dayandırdıq. Bir neçə dövlət orqanlarına müraciət etdik ki, biz tikinti işini apara bilərik ya yox.

Müraciətlərimizə cavab verilmədən İcra Hakimiyyətinin nümayəndəsi “Marin Qrup”un fəhlələrinin iştirakı ilə söküntü işləri aparmağa başladı. Baxmayaraq ki, iş saatı idi və bağçada 40-a yaxın uşaq var idi. Mən onlardan xahiş etdim ki, söküntü işlərini aparmaq haqqında mənə sənəd göstərsinlər.

Onlar mənə məhəl qoymadılar. Tikintinin nümayəndəsi qolumu buararq mənə xəsarət yetirdi. Biz Daxili İşlər Nazirliyyinin 102 çağırı xidmətinə də müraciət etmişdik. İcra hakimiyyətin baş memarı, sahə müvəkilli və 102 çağrı xidmətinin göndərdiyi polis əməkdaşlarının gözü qarşısında mənə xəsarət yetirilib”.

Körpələr evi uşaq bağçasının sahibəsi İradə İbrahimova şikayətinin 20-ci Polis Bölməsində, daha sonra isə Nəsimi Rayon Polis İdarəsində araşdırıldığını bildirdi. O işi araşdıran müstəntiq, polis mayoru Anar Miralayevdən şikayətçi olduğunu və onunla bağlı məhkəməyə müraciət edəcəyini bildiridi.

Məsələ ilə bağlı DİN Mətbuat xidmətinin rəisi, polis polkovniki Ehsan Zahidov  bildirib ki, vətəndaş onlara müraciət etməlidir: "Vətəndaş bizə müraciət etsin, araşdıraq".

Vətəndaşın təmir işlərinin dayandırılması və sonradan binanın üzlüyünün sökülməsi ilə bağlı iddiası barədə Nəsimi Rayon İcra Hakimiyyətinin Baş memarı Ələskər Rüstəmovla əlaqə saxladıq. O bildirdi ki, həmin ərazidə pilot layihə çərçivəsində tikinti işləri aparılır. Həmin ərazi mübahisəli olduğuna görə, iş məhkəməyə verilib. Məhkəmənin qərarı nə olsa, ona uyğun icra ediləcək.