Sahil Babayevlə Vüsal Nəsirlinin adı 10 milyonluq maxinasiyada hallanır - İDDİA

15:04 16-07-2021 414

Bir neçə il öncə mediada Əmək və Əhalinin Sosial Müdafiə Naziri Sahil Babayevlə müavini Vüsal Nəsirlinin adı 10 milyonluq maxinasiyadan hallanması haqqında məlumatlar yayıldı.

Mediada yayılan həmin məqalədə qeyd edilirdi ki, özünüməşğulluq proqramı  həyata keçirilən zaman 2018-ci ildə “İşsizlik Sığortası Haqqında” qanununa əsasən ölkədə işləyən əhalinin əmək haqqından yığılan 1%-i yəni 89 000 000 (səksən doqquz milyon) vəsaitin 35 700 000 (otuz beş milyon yeddi yüz min) manatı 7000 (yeddi min) ailə üçün nəzərdə tutulub.

Həmin vaxt mediada yayılan məlumatlarda iddia olunurdu ki, Əmək və Əhalinin Sosial Müdafiə naziri Sahil Babayevin göstərişi əsasında müavini Vüsal Nəsirlinin yaxın qohumu Fariz adlı şəxsin iştirakı ilə böyük maxinasiyaya yol verilib.

Belə ki, Fariz adlı şəxsə qeyri-rəsmi məxsus olan, 2018-ci ilin avqust ayında “Aqro Kon” və “Biss Ko” MMC-ləri yaradılaraq Dövlət Məşğulluq Xidməti ilə aralarında əsassız və qanunlara zidd olan satınalma müqaviləsi bağlayaraq yuxarıda göstərilən pul vəsaitini həmin MMC-lərə köçürülüb.

Mediada yayılan həmin məqalədə o da qeyd edilirdi ki, “Dövlət Satınalmaları haqqında” Azərbaycan Respublikası Qanunun 17-ci maddəsi tələblərinə zidd olaraq 2018-ci ildə proqram iştirakçılarının aktivlərlə təmin olunması üçün nəzərdə tutulmuş vəsait hesabına malların satın alması açıq tender üsulu ilə keçirilməli olduğu halda ayrı-ayrı müqavilələrə bölünərək 35700000 (otuz beş milyon yeddi yüz min) manat xərc əsassız olaraq aparılıb.

Bu proses açıq tender üsulu ilə aparılmalı idi. Ona görə də dövlətə ayrılan vəsaitdən 18% əlavə dəyər vergisi dövlət büdcəsinə qaytarılmalı idi. Yəni 35700000 X 18%:100 = 6426000 manat vəsait dövlət büdcəsinə qaytarılmalı idi.

Və eyni zamanda 2018-ci ildə Prezidentin Ehtiyat Fondundan şəhid ailələri və Qarabağ əlilləri üçün evlərin alınması məqsədilə nazirliyə ayrılmış 20000000 (iyirmi milyon) manat vəsaitdə açıq tender üsulu ilə keçirilmədiyinə görə 20000000 X 18%:100 = 3600000 manat da büdcəyə qaytarılmayıb.

Bir sözlə, Sahil Babayev 2018-ci ildə Dövlət Büdcəsinə 10026000 ( on milyon iyirmi altı min) manat ziyan vurub.

Həmin vaxt mediada yayılan məqalədə ki, bu korrupsiya halına göz yuman Maliyyə Naziri, Vergilər Naziri və Respublikada Satınalmaları həyata keçirən İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəisi Zahid İsayev nə işlə məşğul olurlar?

Göstərilən vəsait dövlətdən gizlədilsə də 7 (yeddi) min nəfərə deyil, 5 (beş) min nəfərə aktivlər verilib. Özü də necə verilən aktivlərə baxılsa, görürsən ki, ayrılan pulların 60%-i mənimsənilib.

Mediada yayılan məqalədə o da qeyd edilirdi ki, aktiv almış vətəndaşlara verilən müqavilələrdə və aktlarda aktivlərin qiymətləri göstərilməyib. O vaxt vətəndaşlara verilən iri və xırda buynuzlu mal-qaralar əsasən çıxdaş heyvanlar olsa da, qiymətləri daha yüksək göstərlib.

Dövlət Məşğulluq Xidmətində Sektor müdiri vəzifəsində işləyən, əslində Xidməti idarə edən, 2011-2014-cü illərdə Sumqayıt Şəhər Məşğulluq İdarəsini korrupsiya yuvasına çevirən Cavadov Mövlud Əli oğlu rayon Məşğulluq idarələrinə göndərdiyi aktivlərin balansa daxil edilməsi barədə aktı oxucular təqdim edirik.

Mediada gedən məlumatda o da qeyd edilirdi ki, Akt formasında göstərilən yanıbalalı inəklərin əvəzinə boğaz inək, yanıbalalı qoyun əvəzinə subay qoyun və qoç əvəzinə altı aylıq quzular verilmişdir. Aktivlər iki il müddətinə verildiyinə görə həmin erkək quzular ancaq bu müddətə törədici qoç ola bilərlər.

Verilmiş subay qoyunlar bu müddətdə 4 dəfə bala verməlidirlər? Görəsən, onda nazir Sahil Babayev bilirmi ki, törədici qoçun vəzifəsini nə yerinə yetirəcəkdir?

O dövrdə vətəndaşların imkanları zəif olduğu üçün onlara verilmiş yararsız və çıxdaş olunmuş mal-qaranı saxlaya bilmirdilər və nəticədə heyvanlar ölür və ya dəyər-dəyməzinə satılırdı.

Əgər rayon Məşğulluq idarələrinin rəisləri və işçiləri tərəfindən aktivlərin göstərilən qiymətləri vətəndaşlara bildirilsə, onları dərhal işdən azad olunmaları gözləyir.

P.S. Məqalədə qeyd edilən bütün faktlar medaiada dərc edilib və təkzib edilməyib. Qarşı tərəf kimi yazıda adı keçən şəxslərin və qurumların mövqeyini dərc etməyə hazırıq.

Azər Mətin