Əbülfəz Qarayevin həbsi qaçılmazdır

16:17 27-08-2021 459

Rüşvət və korrupsiya sittihamı ilə 8 il həbs cəzasına məhkum edilən sabiq mədəniyyət nazirinin keçmiş müavini Rafiq Bayramovun işi üzrə istintaq materiallarında sensasiya sayılacaq məqamlar var. Qeyd edilib ki, nazir müavini “otkat” və aylıq haqq olaraq ona çatdırılan pulların hamısını Əbülfəz Qarayevə verib. Əbülfəz Qarayev isə məbləğin 15-20 faizini öz müavininə geri qaytarıb.

Maraqlıdır, bu fakt Əbülfəz Qarayevin istintaqa cəlb edilməsi və onun barəsində cinayət işi qaldırılması üçün yetərlidirmi? Ümumiyyətlə, ittihamların fonunda eks-nazirin həbs edilməsi gözləniləndirmi?

Mövzu barədə Yenisabah.az-a danışan tanınmış hüquqşünas Ələsgər Məmmədli qeyd edib ki, bu hal konkret olaraq sübut olunursa, nazir də istintaqa cəlb edilməlidir:

“İstintaqın gedişində bizə məlum olan və olmayan tərəflər var, çünki istintaq sənədləri ilə tam tanış deyilik. Aspektlər aydınlaşdırılmalıdır. Sözsüz ki, bu tip yeyinti halları varsa və nazir-nazir müavini şəbəkələşməsi baş veribsə, müavinin məsuliyyətə cəlb olunub, nazirin kənarda qalması mümkün deyil, hüquqi baxımdan hər kəs məsuliyyət daşıyacaq. Əgər deyilənlər doğrudursa, onlar nazirin istintaqa cəlb olunması üçün yetərlidir. Sübut olunarsa, hüquqi məsuliyyət qaçılmazdır. Həbs müddətinə gəldikdə isə konkret olaraq Cinayət Məcəlləsinin hansı maddəsi ilə cinayət işi açıldığı və prosesdə tərəflərin təqsiri önəmlidir. Amma bütün hallarda bu, cinayət məsuliyyəti yaradır, cinayət məsuliyyəti qaçılmazdır”.

Bir müddət öncə mediada araşdırmaçı jurnalist Cavanşir Həsənlnin keçmiş nazirin və ailəsinin sahib olduğu şirkətlərin siyahısını facebookda yayımlayıb. Yayılan sənədlərdən məlum olub ki, sabiq nazirin ailə şirkətləri Rusiya, Litva, Panama, Malta kimi qitələri aşan coğrafiyanı əhatə edir. Azərbaycandan çıxardığı pullarla xarici ölkələrdə daşınmaz əmlak və digər aktivlər alıb.

Siyahını yenə qısaca yada salaq.

Keçmiş nazirin yeganə övladı - qızı Suad Qarayeva hələ 2002-ci ildən ad və soyadının baş hərflərini özündə ehtiva edən “SQ-FUTURE” MƏHDUD MƏSULİYYƏTLİ CƏMİYYƏTİnin təsisçisidir. BAKI ŞƏHƏRİ SƏBAİL RAYONU, MÜSLÜM MAQOMAYEV, ev 22-də hüquqi qeydiyyatda olan şirkətin qanuni təmsilçisi Ülviyyə Məcidovadır.

Həmin ünvanda 2006-cı ilin martında Əbülfəs Qarayevin həyat yoldaşı KAZIMOVA LALƏ TOFİQ qızının təsisçiliyi ilə Mədəniyyət Nazirliyi tərəfindən maliyyələşdirilən “YOL+İLK ELMİ-POPULYAR DƏRGİ REDAKSİYASI” MƏHDUD MƏSULİYYƏTLİ CƏMIYYƏTİ qeydə alınıb. O, “Jazz Dostları” ictimai birliyinin də təsisçisidir.

Lalə Kazımova 2010-cu ilin dekabrında Türkiyədə ad və soyadının abbreviaturasını ifadə edən KL BODRUM EMLAK TİCARET VE Sanayi LİMİTED ŞİRKETİ-ni təsis edib. Şirkət İstanbul Ticaret Sicili Memurluğunda 5000 TL nizamnamə kapitalı ilə qeydiyyatdan keçib. Nizamnaməyə görə Qarayevlərin ailə şirkəti Türkiyədə və ölkə xaricində turizm obyektləri, otel, yaşayış binaları, villa və idman təsisatların sahib olmaq, işlətmək hüququ əldə edib.



Qarayevlərin Türkiyədəki turizm təsisatları barədə məlumat olmasa da, keçmiş nazirin xanımın sosial şəbəkələrdəki hesabında Bodrumdakı beşulduzlu Kuum hotelinin simvolunu (qoşaqanadlı mələk) profil şəkli seçməsi maraq doğurur.

Lalə Kazımovanın adına Litvada da şirkət qeydiyyata alınıb. “TRIAT EXIRE” UAB (LTD, qeydiyyat nömrəsi 302521161) 10 ilə yaxındır ki, Litvanın daşınmaz əmlak bazarında fəaliyyət göstərir. Vülnüsdə Şaltinıy 22-də Qarayevlər ailəsinə məxsus çoxsaylı daşınmaz əmlak icarəsindən gəlir 35 min dollardan artıqdır.

Əbülfəs Qarayevin qızı Suad Qarayevanın təsisçisi olduğu daha bir daşınmaz əmlak şirkəti 2013-cü ildə Rusiya paytaxtında qeydiyyatdan keçib. QALS MMC (QALS OOO) 20 min rubl nizamnamə kapitalı ilə Moskvanın Tatarskaya küçəsi 7 ünvanında hüquqi qeydiyyata alınıb. Baş direktoru Cəfərov Fərid Oqtay oğludur.

Şirkətin adı Qarayevlər ailəsinin soyad və adlarının abbreviaturasından götürülüb: Qarayev, Abulfas, Lalə və Suad. Şirkət üzərindən Qarayevlər ailəsi Moskvada icarəyə verilmiş çoxsaylı mənzillərə, ticarət obyektlərinə sahibdir. Rusiya Federal Vergi Xidmətində QALS MMC-yə aid məlumatlarda qeyd olunur ki, şirkət 2018-ci ildə daşınmaz əmlak biznesindən 6.7 milyon rubl (təxminən 100 min dollar) gəlir əldə edib, federal büdcəyə 430 min rubl vergi ödəyib.

Qarayevlər ailəsinin GALS adı ilə daha bir neçə şirkəti isə Azərbaycandadır. “GALS GALLERY” MƏHDUD MƏSULİYYƏTLİ CƏMİYYƏTİ 2013-cü il aprelin 19-da qeydiyyatdan keçib. Qanuni təmsilçisi Əbülfəs Qarayevin həyat yoldaşının rəfiqəsi Vəzirova Liana Leonidovnadır. O, Mədəniyyət Nazirliyi nəzdindəki Muzey Mərkəzi binasının inzibati və təsərrüfat müdiriyyətinin direktorudur.



Muzey Mərkəzi “Rus muzeyi də adlanır. Fəaliyyəti elektron-rəqəmsal və çap materialları əsasında rus mədəniyyətini öyrənmək və təbliğ etməkdir.
Muzey Mərkəzinin direktorunun adına rəsmiləşdirilmiş şirkət BAKI ŞƏHƏRİ SƏBAİL RAYONU, YUSİF MƏMMƏDƏLİYEV, ev 14-də hüquqi qeydiyyatdadır.

Həmin ünvanda keçmiş nazirin xanımına məxsus “GALS BEAUTY AND SPA” MƏHDUD MƏSULİYYƏTLİ CƏMİYYƏTİ isə 2013-cü il mayın 3-də Araz Nağıbəyli Əli oğlunun qanuni təmsilçiliyi ilə qeydiyyata alınıb. Lalə Kazımova bu şirkətə bağlı Bakının mərkəzindəki “NailRoom” (Rəşid Behbudov küçəsi 53c və 31c) gözəllik salonlarına da sahibdir.



Əbülfəs Qarayevin özü isə “otkat”lardan aldığı payını daha uzaqlara yatırmağa üstünlük verib. Onun və Milli Məclisin deputatı Hüseynbala Mirələmovun şərik olduğu RİMBA SA. offşor şirkəti 2004-cü ilin fevralında Panamada qeydiyyata alınıb. Adı “sivilizasiyadan, mədəniyyətdən uzaq, cəngəllik” anlamına gələn şirkətin 2005-ci ildə Azərbaycanda qeydiyyatdan keçmiş nümayəndəliyi isə bu yaxınlarda ləğv edilib.

2015-ci ildə Əbülfəs Qarayevin qızı Suad Qarayeva - Maleki ilə ailə quran İran əsilli Britaniya vətəndaşı Şəhriyar Maleki də bu izdivacdan sonra Azərbaycanda iri biznesə sahib olub. O, 2016-cı ildən Bakıda “COLAB” biznes mərkəzlərinin şərikidir. Paytaxtda iki ünvanda - NEFTÇİLƏR PR. 151-də PORT BAKU MALL-da və Time Business Mərkəzində hər biri 1000 kvadratmetrlik iki böyük iş mərkəzlərində ofislər, seminar və konfrans salonları icarədədir.


Məlumatlı mənbə  deyib ki, Ə.Qarayev hazırda bağındadır. Onu bir neçə dəfə istintaqa çağırıblar, amma bu barədə rəsmi bilgi yoxdur. Ə.Qarayevin biznes imperiyası ilə bağlı yayılan sənədələrlə bağlı da izahatı alınıb. “Belə görünür ki, Əbülfəs Qarayev bağında oturub sonrakı taleyini gözləyir” - deyə, mənbə bildirib. Belə ehtimal etmək olar ki, sabiq nazir dövlətə vurduğu ziyanı, buradan qaçırdığı paraları  ya geri ödəməklə razılaşacaq, ya da həbsə girəcək. Mənbələr Qarayevin birinci variantı artıq seçdiyinə işarə edirlər.