“Alimlər şəhərciyi” büdcə pullarını necə yeyir?

13:30 06-01-2022 441

Ramiz Mehdiyevin şübhəli tenderləri

Azərbaycan Milli Elmlər Akademiyasının (AMEA) İşlər İdarəsi “Ruslan Təmir-Tikinti” MMC ilə iki satınalma müqaviləsi imzalayıb.

 

Qaynarinfo.az xəbər verir ki, maliyyə dəyəri 130 663.71 AZN olan müqavilədə Abşeron rayonu, Saray qəsəbəsi ərazisində AMEA əməkdaşları üçün inşa olunan “Alimlər şəhərciyi” yaşayış kompleksində sahədaxili su və kanalizasiya xətlərinin çəkilməsi işlərinin satın alınması, maliyyə dəyəri 89 146.88 AZN olan müqavilədə isə Abşeron rayonu, Saray qəsəbəsi ərazisində AMEA əməkdaşları üçün inşa olunan “Alimlər şəhərciyi” yaşayış kompleksində xarici kanalizasiya xəttinin çəkilməsi işləri ilə əlaqədar açılmış kanaldan kanalizasiya borularına mane olan kabelin yerinin dəyişdirilməsi işlərinin satın alınması nəzərdə tutulur.

 

İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, “Ruslan Təmir-Tikinti” MMC 19 oktyabr 2006-cı ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nizami rayonu, Bəhruz Nuriyev küçəsi, ev 81, mənzil 83-84-də yerləşir. MMC-nin qanuni təmsilçisi Həsənov Murad Çərkəz oğludur.

Açıq mənbələrdə şirkət və onun qanuni təmsilçisi barədə hər hansı məlumat yoxdur. Baxmayaraq ki, MMC 16 ildir fəaliyyət göstərir və iri məbləğli dövlət satınalmalarında iştirak edir, onun nə əlaqə nömrələri, nə də veb-səhifəsi mövcuddur.

“Ruslan Təmir-Tikinti” MMC-yə ən çox sifariş verən qurum isə AMEA-dır. Təkcə 2021-ci ildə AMEA ilə MMC arasında toplam maliyyə dəyəri 823 874.61 AZN təşkil edən 5 satınalma müqaviləsi imzalanıb. Müqavilələrin hamısı Saray qəsəbəsində AMEA əməkdaşları üçün tikilən “Alimlər şəhərciyi”ndə görüləcək işlərlə bağlıdır.

Maraqlıdır ki, AMEA “Ruslan Təmir-Tikinti” MMC ilə sentyabr ayında təxminən yarım milyon manatlıq müqavilə imzalayarkən şirkətin 32 826 AZN vergi borcu olub.

Dövlət satınalmalarında iştirakın əsas şərtlərindən biri də iddiaçının tender komissiyasına vergi borcunun olmadığı barədə arayış təqdim etməsidir. Belə çıxır ki, “Ruslan Tımir-Tikinti” MMC komissiyaya saxta arayış təqdim edib. Yaxud da tender sadəcə formal xarakter daşıyıb.

Mənbə Qaynarinfo.az